老婆來港秘密捧場 林宥嘉︰想畀佢睇到最靚嘅我

林宥嘉（Yoga）一連三場《idol世界巡迴演唱會香港站》前晚在紅館舉行尾場，獲容祖兒、謝安琪等圈中人捧場外，原來Yoga太太丁文琪亦秘密入場撑老公，令Yoga相當驚喜︰「我事前唔知，佢嚟到我會多啲動力。」

林宥嘉前晚在台上全程主要以廣東話與觀眾互動，他以鋼琴自彈自唱時，提議觀眾開手機燈製造燈海，他笑說︰「唔識開燈嘅，隔籬嘅朋友『膠膠』（教教）佢。」令全場爆笑。Yoga獻唱《走鋼索的人》時，一度感觸落淚，有歌迷叫他「不要難過」，他即鬼馬說︰「我沒有很難過，只是覺得自己唱歌的聲音很好聽。」他走到台下握手時，歌迷不但表現熱情，攬攬偶像兼摸面，亦有歌迷送上公仔，Yoga即將公仔塞入自己穿着的斗蓬，再擲回觀眾席，個唱在兩次encore後順利結束。

Yoga在慶功宴上笑言非常眼瞓︰「我怕講錯嘢，你哋唔好問我太難嘅問題。」提到他的廣東話進步神速，他笑說︰「因為個腦開發咗，同埋身邊好多同事都係香港人，佢哋成日講廣東話。（跟兒子講廣東話？）無試過，因為佢未識講嘢，但好似聽得明我講咁，佢好鍾意跳舞，我喺屋企隨便唱，佢就會郁來郁去。」

期望挑戰更多場次

提到太太丁文琪驚喜捧場，Yoga開心說︰「其實我唔知㗎，佢令我有更多動力，我想畀佢睇到最靚嘅我。因為我平時喺屋企好『烏搲』，太太成日話我喺出面就扮靚仔，喺屋企就咁『烏搲』。」另外，提到三場騷歌迷反應熱烈，他表示主辦單位希望他下次挑戰更多場次︰「我聽到即刻起雞皮，因為每場演出我都會用盡energy，但有機會應該試下，好嘅歌手應該有幾多歌迷就開幾多場。」笑指他開騷可開足一個月，他即搞笑說︰「我有咁多歌迷咩？」稍後他往內地、澳洲等地開騷。

撰文︰Pauline

編輯︰李潔盈

美術︰梁政敏